МОНГОЛ УЛСЫН ЁС ЗҮЙН ХОРООНЫ 2025 ОНЫ ЭЭЛЖИТ IV ХУРАЛДААН БОЛЛОО

     Монгол Улсын Ёс зүйн хорооны ээлжит IV хуралдаан 2025 оны 06 дугаар сарын 05-ны өдөр зохион байгуулагдаж, төлөвлөгөөний дагуу 5 асуудлыг хэлэлцлээ.

• “Байгууллага, албан хаагчийн ёс зүйн зөрчилд өртөх эрсдэлийг тооцох үнэлгээний аргачлал батлах тухай” тогтоолын төсөлтэй танилцаж,  үнэлгээний аргачлал, судалгааны асуулгын хүрээнд хэлэлцүүлэг өрнүүлэн, санал солилцон, төрийн албан хаагчийн ёс зүйн зөрчилд өртөх эрсдэлийн үнэлгээний аргачлалыг Ёс зүйн хорооны дарга, гишүүдийн санал зөвлөмжийг тусган дахин боловсруулж, Ажлын алба 14 хоногийн дотор Ёс зүйн хорооны хуралдаанд танилцуулж, батлуулах үүрэг чиглэл өгөв.
• Хойд, Төвийн, Говийн, Зүүн, Баруун, Хангайн бүс, Нийслэлд зохион байгуулагдсан “Бүсчилсэн хөгжил-Төрийн албаны манлайлал” бүсийн зөвлөгөөн болон сумдын төрийн байгууллагад зөвлөн туслах,  мэргэшил арга зүйн зөвлөгөө өгөх, чиглэлээр ажилласан ажлын үр дүнг танилцуулсан бөгөөд бүсийн зөвлөгөөний үр дүн, гарсан санал, шүүмж болон цаашид хэрэгжүүлэх үйл ажиллагааны талаар мэдээлэл бэлтгэн УИХ-ын Ёс зүй, дэгийн байнгын хороонд хүргүүлэхээр шийдвэрлэсэн.

• Төрийн албан хаагчийн ёс зүйн тухай хууль, Төрийн албан хаагчийн ёс зүйн зөрчлөөс урьдчилан сэргийлэх, соён гэгээрүүлэх үндэсний хөтөлбөрийн хэрэгжүүлэх ажлын хүрээнд Ёс зүйн хороо, Удирдлагын академитай хамтран “Ёс зүйн сургагч багш” бэлтгэх сургалтыг 2025 оны 05 дугаар сарын 19-23, дадлага хичээлийг 05 дугаар сарын 26, 27-ны өдрүүдэд тус тус зохион байгуулсан ба сургалтын үр дүн, хэрэгжүүлэх үйл ажиллагааны талаар танилцуулав. Хуралдаанаар сургалтын зохион байгуулалт, санхүүжилтийг нэмэгдүүлэх, холбогдох байгууллагуудтай хамтран шийдвэрлэх чиглэлээр анхаарах асуудал, сургалтын үр дүнг сайжруулах чиглэлээр шийдвэрлэх санал гаргаж, Ажлын албанд зөвлөмж, чиглэлийг өгөв.
• “Төрийн албан хаагчийн ёс зүйн зөрчлөөс урьдчилан сэргийлэх, соён гэгээрүүлэх үндэсний хөтөлбөрийн хэрэгжилтийн үр дүнгийн хяналт-шинжилгээ, үнэлгээний шалгуур үзүүлэлт”-д Ёс зүйн хороо, төрийн бүх шатны байгууллага хэрэгжүүлэхээр заасан нийт 33 арга хэмжээний 2025 оны эхний хагас хэрэгжилтийн явцыг хэлэлцүүлж, Үндэсний хөтөлбөрийн хэрэгжилтийг үр дүнтэй зохион байгуулж, хяналт тавьж, хуулийн хугацаанд тайлагнаж ажиллахыг үүрэг болгов.
• Ёс зүйн хороонд 2025 оны эхний хагас жилд ирсэн гомдол, мэдээллийг судлан, хуульд заасан харьяаллын дагуу холбогдох байгууллагуудын Ёс зүйн дэд хороонд шалган шийдвэрлүүлэхээр шилжүүлсэн болон хяналт тавьж ажилласан тухай танилцуулгыг хэлэлцүүлж, уг асуудлын хүрээнд өргөдөл, гомдолд дурдагдсан асуудлыг төрөлжүүлэн дүн шинжилгээ хийж, хуулийн хэрэгжилтийг ханган, Ёс зүйн дэд хороодыг мэдээллээр ханган  ажиллах үүрэг чиглэл Ажлын албанд өгснөөр хуралдаан өндөрлөв.

ЁС ЗҮЙН ХОРОО