"ЁС ЗҮЙН ЗӨРЧЛИЙН БҮРТГЭЛ, ХЯНАЛТ" ЦАХИМ СИСТЕМ БИЙ БОЛНО

Ёс зүйн хорооны дарга, Төрийн албаны зөвлөлийн гишүүн Ц.Амартөгс аймаг, нийслэлийн Засаг даргын тамгын газрын дарга, бусад удирдах албан тушаалтанд мэдээлэл өглөө.

Төрийн албан хаагчийн ёс зүйн тухай хууль болон Ёс зүйн хорооны ажиллах журам 2023 онд батлагдаж, хууль, журмын дагуу Ёс зүйн хороо 9 гишүүний бүрэлдэхүүнтэй байгуулагдсан. Ёс зүйн хорооны 2024 оны 2 дугаар сарын 09-ний өдрийн 05 дугаар тогтоолоор “Ёс зүйн дэд хорооны ажиллах журам” батлагдаж, захиргааны хэм хэмжээний актын бүртгэлд орсон. Мөн Улсын Их Хурлын чуулганы өчигдөр (2024.04.18)-ийн хуралдаанаар “Төрийн албан хаагчийн ёс зүйн зөрчлөөс урьдчилан сэргийлэх үндэсний хөтөлбөр”-ийг баталснаар хууль, тогтоомжийг хэрэгжүүлэх бодлого, эрх зүйн орчин бүрдлээ гэдгийг онцлов. Ингэснээр төрийн албаны Хүний нөөцийн удирдлагын мэдээллийн тогтолцоо систем дэх “Ёс зүйн зөрчлийн бүртгэл, хяналт” цахим систем бий болгож, ёс зүйн зөрчлийг бүртгэхийн зэрэгцээ албан хаагчид ёс зүйн хариуцлага хүлээлгэсэн шийдвэрийг байгууллагууд цахим хуудастаа байршуулдаг болох юм. Энэ нь иргэдийн гомдол, мэдээллийг хянан шийдвэрлэж байгаа байдлыг олон нийтэд шуурхай мэдээлэх, иргэдийн оролцоо хяналтыг нэмэгдүүлэхэд чухал алхам болно.

Нутгийн захиргааны байгууллагуудын хувьд Ёс зүйн дэд хороодыг журмын дагуу шинээр байгуулж, төрийн албан хаагчийн ёс зүйн зөрчлийн талаар гомдол, мэдээллийг шуурхай шийдвэрлэх ажил тулгамдаж байгааг анхааруулж, дэд хороодын бүрэлдэхүүн, ажиллах журам, урамшууллын талаар нэмэлт мэдээлэл өгч, оролцогчдын асуултад хариуллаа.

Ёс зүйн дэд хороо бүрэлдэхүүний хувьд 40 ба түүнээс цөөн бол 3 гишүүн, 41–90 бол 5 гишүүн, 91-дээш бол 7 гишүүнтэй байхаар журамлажээ.