Сайн түшмэдтэй төр л сайн төр байж чадна

Анхдугаар “Үндсэн хууль”-аа баталж, Бүгд Найрамдах Улс тунхагласны 99 жилийн ойг угтаж Төрийн албаны зөвлөлөөс санаачлан “Чингис хаан” Үндэсний музейтэй хамтран “Төрийн албан хаагчийн ёс зүйн тухай хуулийн хэрэгжилтийг сурталчлан таниулах” сургалтыг 2023 оны 11 дүгээр сарын 24-ний өдөр зохион байгуулав.

Тус үйл ажиллагаанд УИХ-ын даргын ахлах зөвлөх, Шихихутуг их сургуулийн Эрдмийн зөвлөлийн дарга, Хууль зүйн шинжлэх ухааны доктор, профессор Д.Лүндээжанцан, Төрийн албаны зөвлөлийн дарга Б.Баатарзориг, Төрийн албаны зөвлөлийн  гишүүд, Ёс зүйн хорооны гишүүд, Яамдын төрийн нарийн бичгийн дарга, Засгийн газрын хэрэгжүүлэгч болон тохируулагч Агентлагийн дарга нар болон төрийн албан хаагчдын төлөөлөл  оролцов.

Төрийн албаны зөвлөлийн дарга Б.Баатарзориг хүрэлцэн ирсэн зочдыг танилцуулж, сургалтын үйл ажиллагааг нээв. 

УИХ-ын дарга Г.Занданшатарын мэндчилгээг УИХ-ын даргын ахлах зөвлөх Д.Лүндээжанцан танилцуулав. Тус мэндчилгээнд “Сайн түшмэдтэй төр л сайн төр байж чадна” гэж УИХ-ын дарга чухалчлан сануулсныг төрийн албаны тэргүүн түшмэдэд дурдлаа. 

Төрийн албаны зөвлөлийн гишүүн, Ёс зүйн хорооны даргын үүрэг гүйцэтгэгч Д.Баатарсайхан “Төрийн албан хаагчийн ёс зүй”, “Чингис хаан” Үндэсний музейн хэлтсийн дарга, доктор На.Батболд “Чингис хааны ёс суртахуун ба Монголчуудын үнэт зүйл” сэдвээр илтгэл хэлэлцүүллээ. 

Төрийн албаны зөвлөлийн дарга Б.Баатарзориг нээж хэлсэн үгэндээ XIII зууны Монгол Улс хүчтэй байсны шалтгаан нь төрийн үйл ажиллагаагаа хурд, технологи, мэдээлэл, зохион байгуулалт гэсэн дөрвөн гол хүчин зүйлийг чухалчилдаг байсан бөгөөд өнөөдрийн төрийн албаны шинэтгэл, өөрчлөлтийн зарчим болгон хэрэгжүүлж, төрт ёсны залгамж холбоог үргэлжлүүлэх хэрэгтэйг онцлов.

Оролцогчид “Чингис хаан” Үндэсний музейн Их Монгол Улс, Монгол бахархал танхимд дэглэсэн үзмэртэй танилцлаа. 

СУРГАЛТАД МОНГОЛ УЛСЫН ИХ ХУРЛЫН ДАРГА ГОМБОЖАВЫН ЗАНДАНШАТАРЫН ХЭЛСЭН ҮГ: https://csc.gov.mn/content/6560485beff1fb8e6535ec6a

ТӨРИЙН АЛБАНЫ ЗӨВЛӨЛ