ЁС ЗҮЙН ХОРООНЫ ОРОН ТООНЫ ГИШҮҮД ҮНЭМЛЭХЭЭ ГАРДАН АВЛАА

Монгол Улсын Их Хурлаас 2023 онд Төрийн албан хаагчийн ёс зүйн тухай анхдагч хуулийг батлан гаргасан бөгөөд өнгөрөгч оны долоодугаар сарын 1-ээс хэрэгжиж эхэлсэн.

 

Төрийн албан хаагчийн ёс зүйн хууль тогтоомжийн хэрэгжилтэд хяналт тавих, ёс зүйн зөрчлөөс урьдчилан сэргийлэх, соён гэгээрүүлэх чиг үүрэг бүхий Ёс зүйн хороотой байх, уг хороо нь Төрийн албаны төв байгууллагын дэргэд ажиллахаар хуульчилсан. Хуулийн дагуу Ёс зүйн хороог 9 гишүүний бүрэлдэхүүнтэй байгуулж, хорооны даргаар Төрийн албаны зөвлөлийн гишүүн Ц.Амартөгсийг сонгосон юм.

 

Улсын Их Хурлын Ёс зүй, сахилга хариуцлагын байнгын хорооны дарга Б.Баттөмөр өнөөдөр (2024.02.15) Ёс зүйн хорооны дарга, орон тооны зарим гишүүдтэй уулзаж, үнэмлэхийг нь гардуулж, хууль хэрэгжүүлэх чиглэлээр санал солилцлоо.

 

Ёс зүйн хороо нь Төрийн албаны зөвлөлийн гишүүд, орон тооны бус 4, нийт 9 гишүүний бүрэлдэхүүнтэй байх юм. Орон тооны бус 4 гишүүнийг Улсын Их Хурлын Ёс зүй, сахилга хариуцлагын байнгын хороо томилж, чөлөөлнө.